孳息倒掛

美債孳息曲線上周五出現倒掛，市場憂慮經濟衰退風險上升，拖累道指當晚急瀉460點，港股今日低開500點

簡單來說，一般我地去做定期，年期越長，利息越高

因為投資於愈長年期的債券/定期，資金就會被鎖定得愈久，通脹、其他不確定性與風險相應亦會愈高，回報率定然要更高才划算，因此通常年期愈長利息愈高。

而所謂收益率曲線倒掛，即短期債息高於長期債息，一般來說，市場認為是預測經濟衰退的指標之一

樓市短評

最近出席幾次飯局，樓市都成為飯局間既熱門話題，樓價好似火箭咁連續升左咁多年，終於叫做見下跌既趨勢

講下我自己對樓市既睇法

1)剛性需求
呢一點係無變既，係香港空置率咁低既情況下，住係籠屋，貨櫃屋，工廈劏房既大有人在。隨便出街走轉,都一定感覺到香港的確係超多人，跟據政府統計處上年公布既2016年中期人口統計結果，顯示現時家庭住戶的居所樓面面積中位數約430呎，港人均居住面積則為161呎，世界之最咁迫

2)持貨能力
坊間不時都有人話，香港有六成幾既業主已經供滿層樓，持貨能力大，無壓力，所以樓價不會跌。
呢個論點我係唔認同既，升跌主因係供求同價格預期。你想像下，你手上有價值一百萬既股票，唔係孖展戶口，已經比曬錢交收，但你預期黎緊一年股價會跌兩成，你會因為無持貨壓力而持有嗎？當然唔會
如果你預期會跌，當然係沽左先，等跌完低價再買返，所以持貨能力並唔係支持樓市既主因

3）辣招扭曲市場
就上一個論點，如果預期手上股票會跌兩成，你會即刻沽左先，但樓呢，情況會唔一樣，因為辣招導致交易成本大增，買家印花稅 （BSD）、雙倍印花稅（DSD）、額外印花稅（SSD) 再加上 佣金、律師費等等..仲未計睇樓搵樓既時間成本
預期跌一至兩成,都唔會吸引你你沽，如果係股票，你有3隻貨,你可能沽一隻先，樓呢 ? 未有辣招前你唔洗比（DSD）買左三間,沽左再買返就要比（DSD），變相唔比你減持

4) 境外投資者
近幾年，多左好多外地投資者黎香港買樓，特別係內地資金，一來買個時已經比左雙倍印花稅,而且呢D錢好不容易由內地轉到香港(外匯管制)，黎到香港做資產配置，唔會隨便匯返內地，而且香港可收的租金比內地更高呢

講完好既因素,講衰既因素

1)經濟前景不明
係貿易戰未見到短期內可以解決既情況下，影響中港經濟無可避免，,而經濟前景不明，會影響投資意慾同風險胃納，股市已經即時受到影響，從而影響財富效應，因為帳面財富的持續上升可以帶來財富效應（Wealth Effect），持股者以為自己身家愈來愈豐厚了，會更樂於消費/投資，對經濟也會產生正面效應,反之亦然

2)加息因素
供樓利息增加一方便增加成本， 同時會減低收租既吸引力,租金比樓價更受實體經濟影響， 而租金在下跌的同時，銀行比既存款卻增加,此消彼長
例如過去一年車位價格升得極急，收租回報降至2-2.5厘，係車位價格預期上升時或者仲可以接受，但如果價格預期不再向上，而銀行定期存款已經升到2厘，投資車位還有那麼吸引嗎?

3)價格預期
最重要既因素，越多人睇跌，就越小人買，越無人買，價就越跌，住宅舖位既上升，骨牌效應會引致車位工廈既抄風，而跌既時候，骨牌效應同樣會發揮佢既影響力

佛系抄股

網上流傳一則股票笑话 :

某寺廟方丈多年來投資股市收獲甚豐，有人不禁問：「方丈真乃佛門股神，大師炒股可有獨門心得？」方仗回答：「貧僧於股市低迷時，眼見塵世間無數股民被套於水深火熱之中，不禁動惻隱之心，盡己之所能在市場買入股票，助其解套。其後股市暢旺，眾人紛急於搶購，貧僧連忙將股票售出，希望讓眾股民如願購得。不知為何，多年下來竟然獲利極豐。」

細心一看,竟在股神巴菲特名句有異曲同工之妙
「別人貪婪我恐懼，別人恐懼我貪婪」

FI南方恒指(7300)

最近呢兩個月都係預左跌市為主, 傳統應對方法都係楂多小小現金,,小d手多多..
不過其實仲有好多工具/操作 可以幫到手既 , 除左熊仔,期權期貨外
呢排多人買隻 FI南方恒指(7300) ,
簡單講,2800既相反,無到期日,無時間值,無槓桿,無回收, 指數趺 1% 佢就升 1%,

睇新聞

上星期有幾個朋友都問我今日因為咩新聞跌成咁。
我自己會比較在意直接感受市況，因為用已知新聞黎判斷後市仲有無得跌係有好大限制。

先唔好講一般人都接觸到既新聞已經唔係（新）聞。無論你點去解讀個新聞，大戶對同一個新聞既睇法可能唔同，怎至可能大戶睇到我地睇唔到既消息（最怕呢種）。
而佢係市場上既行為就直接反應左佢經過所有我地知或唔知既消息之後做既決定（買/沽）

毛記葵涌

毛記以8.4元高開，隨即抽升至11.76元，較招股價高出8.8倍，可惜很快無以為繼，一度低見5.61元，較高位回落逾50%，最後以6.38元收市，交易量1.85億股，為街貨量逾兩倍。若前日以暗盤收市價8.1元追入的投資者，暫時賬面每手蝕3440元

我地預計毛記目標價$8，癲價可能到$10-12，都算接近估算。

其實新股要估算價位準確，係困難。而就算今次出現比我地估算既更癲例如$16-$20，搞到好似食小左咁，下次都應該照保持原有理念，唔貪食最後火花，如果要食到預期最盡個口$12，差小小食唔到，價回，會唔捨得沽，等再上..等下等下，就見返$6

賣仔莫摸頭，沽左就算，唔好太在意接你貨個位仲有無得賺，人地$8接你貨升到$10，呢$2-$3係受好大風險去博既，比佢。

負值spread

講解返個操作 , 我上星期5 以 312點  買入 (long call) 一張 行使價 12200 既4月國指期權 ,
今朝張期權升到 430 , 如果我沽返出去 平倉 , 就賺 430-312 =  118點
每點 $50 , 即係賺 $ 5,900

不過我做既係鎖倉 沽出 12400 既4月國指期權 , 收返 319 點
long call 12200 + short call 12400 變成一套 spread 
由於 call 個時付出 312 , 而 short 收返 319 , 所以我係0零本 (仲有7點收)

如果4月期結低過 12200 , 套期權無價值 , 咁我賺 7點
如果4月期結高過 12400 , 套期權值200點 , 咁我賺 207點   ($10350)

如果期結係 13000
我long call 個張 12200行使價 , 應該值 800點   (13000-12200)
而short  call 個張12400, 應該值 600點

無講升幾多, 呢兩張行使價差200畸既期權,既價值都一家差200
所以, 只要4月期結高過 12400 , 套期權值200點

由於我建立呢套 spread 既成本係 -7 點 (人稱負值spread) , 所以我 賺 207點


咁如果期結低過 12200 又點呢 ?

如果期結在 11800

我long call 個張 12200行使價 , 值 0點 
而short  call 個張12400, 值 0點


由於我做成負值spread ,無論之後大市升跌, 呢套spread都唔會輸, 最小賺7點